Shumica parlamentare duhet të formojë qeverinë e re edhe pa mandat nga presidenti i shtetit George Ivanov, vlerëson një pjesë e ekspertëve juridik.

Sipas profesorit  Bekim Kadriu, kreu i shtetit nuk ka shumë hapësirë për manovrime të tjera politike.

“Nëse kryetari i shtetit vendos mos e jep mandatin megjithatë kuvendi përsëri do të ketë kompetencë që të bëjë zgjedhje të qeverisë dhe do ta zgjedhë qeverinë pa mandatin e Ivanovit. Do ta përsëris një qëndrim, ne nuk mund të jemi peng e shkeljes së Kushtetutës nga Ivanovi por edhe nga ana e kushdo qoftë tjetër. Presidenti i shtetit është thënë se shumë shpesh bënë shkelje të detyrës zyrtare, bënë vepër penale – keqpërdorim të detyrës zyrtare dhe nuk mund me kryerje të veprave të këtilla të bllokohet themelimi ligjor i institucioneve, të bllokohet konstituimi i institucioneve qendrore”, ka thënë Kadriu. Për profesorin Temellko Ristevski presidenti i shtetit George Ivanov me mos-dorëzimin e mandatit bënë shkelje të rëndë të Kushtetutës dhe përveç që do të mbajë përgjegjësi politike, duhet të mbajë edhe përgjegjësi penale.

“Kryetari i shtetit patjetër të jep mandatin, në të kundërt ai është në kundërshtim me dëshirën e shumicës së qytetarëve. Ai nuk është përmbi qytetarëve, ai është individ dhe duhet të respektojë dëshirën e shumicës parlamentare. Nëse këtë nuk e bënë, ai bënë shkelje të rëndë të Kushtetutës dhe duhet të mbajë përgjegjësi politike, por edhe përgjegjësi penale”, ka thënë Ristevski. Kadriu dhe Ristevski vlerësojnë se skenat e përgjakshme të 27 prillit nuk do të përsëriten në rast që shumica parlamentare formon qeverinë e re pa mandat nga kryetari i shtetit. Ata thanë se sot rrethanat janë ndryshuar dhe se vizita e fundit e zëvendës-ndihmësit të sekretarit shtetëror të SHBA-ve Hojt Ji dhe zbutja e qëndrimit të Ivanovit në lidhje me mandatin, janë sinjale pozitive se kriza shkon drejt zgjidhjes paqësore./Arbresh.info/